Santa Comba.-16/10/2011 Efectivos do Consorcio Provincial Contraincendios e Salvamento da Coruña con base no Parque de Bombeiros do Xallas-A Barcala interviñeron como consecuencia dun accidente de tráfico acontecido á altura da parroquia de Alón, no termo municipal de Santa Comba.
O Centro de Coordinación de Emerxencias 112-Galicia recibiu o aviso e deseguido se mobilizaron os bombeiros, os que, cando chegaron ó lugar do sinistro, atopáronse cun vehículo que estaba ardendo, que previamente sofrira unha saída da vía e chocara contra un poste de formigón do tendido eléctrico. O seu labor consistiu en sufocar o incendio e na limpeza da estrada dos restos do automóbil.
Ata o lugar do accidente desprazáronse un cabo xefe de quenda, tres bombeiros e os vehículos autobomba urbana e nodriza. Ademais dos bombeiros, tamén colaboraron na intervención membros da Garda Civil de Santa Comba, da Garda Civil de Tráfico de Corcubión e persoal do GRUMIR de Santa Comba. Unha vez rematado o servizo, recollidos os datos necesarios e o material empregado, regresaron á súa base, quedando de novo operativos.