Ribeira.-29/07/2011 Efectivos do Consorcio Provincial Contraincendios e Salvamento da Coruña con base no Subparque de Bombeiros do Barbanza extinguiron un incendio nunha vivenda abandonada situada na rúa Portugal, no termo municipal de Ribeira.
O Centro de Coordinación de Emerxencias 112-Galicia recibiu o aviso e deseguido se mobilizaron os bombeiros, os que, cando chegaron ó lugar do incidente, atopáronse con que o lume afectaba a vivenda na súa totalidade, co risco de alcanzar os inmobles lindeiros. O seu labor consistiu en sufocar o incendio.
Ata a zona desprazáronse dous bombeiros e os vehículos autoescada e autobomba nodriza. Ademais dos bombeiros, tamén participaron na intervención membros do Corpo da Policía Local, da Policía Nacional e do GRUMIR de Ribeira. Unha vez rematado o servizo, recollidos os datos necesarios e o material empregado, regresaron á súa base, quedando de novo operativos.